સરકાર ટૂંક સમયમાં હવે નિર્ણય જાહેર કરે તો વિદ્યાર્થીઓનું ભવિષ્ય બચી જાય
રશિયા અને યુક્રેન વચ્ચે યુદ્ધ હજુ સમાપ્ત થયું નથી, આવી સ્થિતિમાં યુક્રેનમાં ભણતા ભારતીય વિદ્યાર્થીઓનું ભવિષ્ય અટવાઈ ગયું છે. સુપ્રીમ કોર્ટ પણ આ મામલે તપાસ કરી રહી છે. હવે સરકાર વિદ્યાર્થીઓના શિક્ષણ પર વિચાર કરી રહી છે.
રુસ-યુક્રેન યુદ્ધે ભારતીય વિદ્યાર્થીઓ માટે પણ મુશ્કેલી લાવી હતી. યુદ્ધ પહેલાં, યુક્રેનમાં હજારો વિદ્યાર્થીઓ મેડિકલ અભ્યાસ કરતા હતા. પરંતુ યુદ્ધ ફાટી નીકળવાના કારણે ભારતીય વિદ્યાર્થીઓએ તેમનો અભ્યાસ છોડીને વતન પરત ફરવું પડ્યું હતું. જેના કારણે હવે હજારો વિદ્યાર્થીઓનું ભવિષ્ય અટવાયું છે. તે જ સમયે, હવે ભારત સરકાર દેશમાં જ પરત ફરેલા વિદ્યાર્થીઓ માટે બાકીનો અભ્યાસ પૂર્ણ કરવાની યોજના બનાવી રહી છે.
યુક્રેનમાંથી બહાર કાઢવામાં આવેલા ભારતીય મેડિકલ વિદ્યાર્થીઓના દેશમાં એડમિશન અને અભ્યાસ ચાલુ રાખવાના મુદ્દે નિર્દેશ માંગતી માર્ચમાં સુપ્રીમ કોર્ટમાં પીઆઈએલ દાખલ કરવામાં આવી હતી. આ પછી કોર્ટે નેશનલ મેડિકલ કમિશનને આ મામલાની તપાસ કરવા કહ્યું હતું.
સુપ્રીમ કોર્ટે રાષ્ટ્રીય મેડિકલ કમિશનને દેશની મેડિકલ કોલેજોમાં યુદ્ધ પ્રભાવિત વિદ્યાર્થીઓને ક્લિનિકલ તાલીમ પૂર્ણ કરવાની મંજૂરી આપવા માટે બે મહિનામાં એક યોજના તૈયાર કરવાનો આદેશ આપ્યો હતો. રશિયા-યુક્રેનમાં યુદ્ધ શરૂ થતાં હજારો વિદ્યાર્થીઓ ત્યાં ફસાયા હતા.
ભારતીય વિદેશ મંત્રાલયે ભારતીય વાયુસેનાની મદદથી અને તેની શ્રેષ્ઠ વિદેશી મુત્સદ્દીગીરી વડે લગભગ 18 હજાર ભારતીય નાગરિકો અને વિદ્યાર્થીઓને રશિયન સેનાના હુમલા અને યુક્રેનિયન સેનાના જવાબી કાર્યવાહી વચ્ચે યુક્રેનમાંથી બચાવ્યા અને તેમને પાછા લાવ્યા. ત્યારથી આ વિદ્યાર્થીઓનો અભ્યાસ ખોરવાઈ ગયો છે અને યુક્રેનમાં બધું જ બરબાદ થઈ ગયું છે. તેથી નજીકના ભવિષ્યમાં તેમને પાછા મોકલવાનું શક્ય નથી. આવી સ્થિતિમાં તેમને તેમના ભવિષ્યની ચિંતા સતાવી રહી છે.
