શું ઓમીક્રોનની દહેશતે ૫ રાજ્યોની ચૂંટણી મોકૂફ રહેશે ?

યુપી વિધાનસભાની ચૂંટણી મોકૂફ રાખવા હાઈકોર્ટે વડાપ્રધાન અને ચૂંટણી કમિશનરને વિનંતી કરી: રેલીઓ રોકવાની હિમાયત કરી

અલ્હાબાદ હાઈકોર્ટે વડાપ્રધાન અને ચૂંટણી કમિશનરને વિનંતી કરી છે કે તેઓ દેશ અને વિદેશમાં નવા પ્રકાર ઓમિક્રોનના પ્રસારને ધ્યાનમાં રાખીને યુપી વિધાનસભાની ચૂંટણીને થોડા સમય માટે મુલતવી રાખે. કોર્ટે કહ્યું કે, ઉત્તર પ્રદેશની આગામી વિધાનસભા ચૂંટણીમાં લોકોને કોરોનાની ત્રીજી લહેરથી બચાવવા માટે રાજકીય પક્ષોની ભીડ એકઠી કરતી ચૂંટણી રેલીઓ પર પ્રતિબંધ મૂકવો જોઈએ. જે રીતે અલ્લાહાબાદ હાઇકોર્ટે હાલ ઉત્તર પ્રદેશ વિધાનસભાની ચૂંટણી મોકૂફ રાખવા વિનંતી કરી છે ત્યારે અન્ય ચાર રાજ્યોમાં પણ ટૂંક સમયમાં જ ચૂંટણી પડઘમ વાગી જનાર છે ત્યારે શું કોરોનાની દહેશત વચ્ચે આગામી ૫ રાજ્યોની ચૂંટણી મોકૂફ રાખવામાં આવશે કે કેમ? તે સવાલ ઉદ્ભવયો છે.

કોર્ટે સૂચન કર્યું કે રાજકીય પક્ષોને ટીવી અને અખબારો દ્વારા પ્રચાર કરવાનું કહેવામાં આવે.  તેમણે વડા પ્રધાનને રાજકીય પક્ષોની ચૂંટણી સભાઓ અને રેલીઓને રોકવા માટે કડક પગલાં લેવા વિનંતી પણ કરી હતી.  એવું પણ કહેવામાં આવ્યું હતું કે વડાપ્રધાને ચૂંટણી મોકૂફ રાખવાનો પણ વિચાર કરવો જોઈએ કારણ કે જીવન છે તો  દુનિયા છે.

જસ્ટિસ શેખર કુમાર યાદવે ગેંગસ્ટર એક્ટના એક આરોપીની જામીન અરજી પર આપેલા આદેશમાં આ વાત કહી હતી.  તેણે પ્રયાગરાજના કેન્ટ પોલીસ સ્ટેશનમાં નોંધાયેલા કેસના આરોપી સંજય યાદવના જામીન સ્વીકારી લીધા છે.

કોર્ટે કહ્યું કે આજે આ કોર્ટ સમક્ષ લગભગ ૪૦૦ કેસ લિસ્ટેડ છે.  આ કોર્ટમાં કેસો નિયમિતપણે સૂચિબદ્ધ થાય છે જેના કારણે વધુ સંખ્યામાં વકીલો હાજર છે અને તેમની વચ્ચે કોઈ સામાજિક અંતર નથી.  ન્યાયાધીશે કહ્યું કે વકીલો એકબીજાની નજીક છે.  જ્યારે કોરોનાના નવા પ્રકારના દર્દીઓ વધી રહ્યા છે અને ત્રીજી લહેર આવવાની સંભાવના છે.

કોર્ટે કહ્યું છે કે, “ચૂંટણી સભાઓ રોકવા માટે, ચૂંટણી પંચે પ્રતિબંધ મૂકવો જોઈએ. કડક પગલાં લેવા જોઈએ. અને પક્ષોની રેલીઓ. ચૂંટણી મુલતવી રાખવાનો પણ વિચાર કરો, કારણ કે જો જાન હૈ તો જહાં હૈ.”

કોર્ટે ખાસ કરીને યુપી પંચાયતની ચૂંટણીઓ અને પશ્ચિમ બંગાળ વિધાનસભાની ચૂંટણીઓ દરમિયાન કોવિડની બીજી લહેરને કારણે થયેલ વિનાશને પર  પ્રકાશ  પાડ્યો હતો . બીજી લહેર દરમિયાન, અમે જોયું છે કે લાખો લોકો કોરોનાથી સંક્રમિત થયા છે અને મૃત્યુ પામ્યા છે. ગ્રામ પંચાયતની ચૂંટણીઓ અને બંગાળ વિધાનસભાની ચૂંટણીઓએ ઘણા લોકોને ચેપ લગાવ્યો છે અને ઘણી જાનહાનિ થઈ છે. તેણે ભારત જેવા વિશાળ વસ્તી ધરાવતા દેશમાં “મફત રસીકરણ” તરફના તેમના પ્રયાસો માટે વડાપ્રધાન મોદીની પહેલની પણ પ્રશંસા કરી.

આપણા દેશના વડા પ્રધાને ભારત જેવી વિશાળ વસ્તી ધરાવતા દેશમાં મફત કોરોના રસીકરણની ઝુંબેશ શરૂ કરી છે, જે પ્રશંસનીય છે અને અદાલત તેમની પ્રશંસા કરે છે અને  વડા પ્રધાનને આને ધ્યાનમાં રાખીને કડક પગલાં લેવા વિનંતી કરે છે. ચૂંટણી યોજવા પર વિચાર કરવા પર કહ્યું કે “આ ભયંકર રોગચાળાની સ્થિતિ, અને રેલીઓ, સભાઓ અને આગામી ચૂંટણીઓને રોકવાની અને મુલતવી રાખવાની શક્યતા છે કારણ કે જ્યાં સુધી જીવન ન હોય ત્યાં સુધી વિશ્વનો કોઈ અર્થ નથી, કોર્ટે આદેશની નકલ અલ્હાબાદ હાઈકોર્ટના રજિસ્ટ્રાર જનરલ, ચૂંટણી પંચ અને કેન્દ્ર સરકારને મોકલવાનો નિર્દેશ આપ્યો હતો.

કાંચીડાની જેમ કલર બદલતો કોરોના કેટલા ડોઝ લેવડાવશે?

ઓમીક્રોનથી બચવા જર્મનીમાં ચોથા બુસ્ટર ડોઝની જાહેરાત બ્રિટનમાં પણ વધતા કેસને પગલે ચોથા ડોઝની તૈયારીઓ

કાચીંડાનીં જેમ રંગ બદલતો કોરોના રસીના કેટલા ડોઝ લેવડાવશે? તેવો સવાલ ઉદ્ભવયો છે. અગાઉ બે ડોઝ લેવાથી કોરો સામે સંપૂર્ણ રક્ષણ મેળવી શકાય છે તેવો મત નિષ્ણાતોએ વ્યક્ત કર્યો હતો. ત્યારબાદ ત્રીજો બુસ્ટર ડોઝ પણ લેવો પડશે કે કેમ તેની અવઢવ ચાલી રહી છે તેવા સમયે હવે જર્મનીમાં કોરોનાના ઓમિક્રોન વેરિઅન્ટથી બચવા માટે કોવિડ વિરોધી રસીના બે ડોઝ નહીં, પરંતુ ચાર ડોઝ આપવામાં આવશે. અમે વાત કરી રહ્યા છીએ જર્મનીની જ્યાં ઓમિક્રોનના કેસ ઝડપથી વધી રહ્યા છે. જર્મનીએ કોરોનાવાયરસના ઓમિક્રોન પ્રકાર સામે રક્ષણ આપવા માટે ચોથા કોવિડ બૂસ્ટર ડોઝના રોલઆઉટની જાહેરાત કરી છે. બ્રિટન પણ તેના નાગરિકોને ચોથો ડોઝ આપવાનું વિચારી રહ્યું છે, કારણ કે લાખોની સંખ્યામાં કેસ પણ વધી રહ્યા છે.જર્મન આરોગ્ય પ્રધાન કાર્લ લૌટરબેચે કહ્યું હતું કે  ઓમિક્રોન સાથે

વ્યવહાર કરવા માટે ચોથા ડોઝની જરૂર પડશે, ડેઇલી મેલે અહેવાલ આપ્યો છે. જર્મનીએ ઓમિક્રોનને ધ્યાનમાં રાખીને બનાવવામાં આવેલી ખાસ રસી ખરીદવા ઉત્પાદક બાયોએનટેકને લાખો નવા ડોઝનો ઓર્ડર આપ્યો છે. જો કે, એપ્રિલ અથવા મે પહેલા ડિલિવરી અપેક્ષિત નથી. જર્મનીના આરોગ્ય મંત્રીએ કહ્યું કે મોડર્ના કોવિડ રસી હાલમાં બૂસ્ટર ડોઝ તરીકે ઉપયોગમાં લેવાય છે. તેમણે કહ્યું કે જર્મનીએ નવી નોવાવેક્સ રસીના 4 મિલિયન ડોઝ અને નવી વાલ્નેવા રસીના 11 મિલિયન ડોઝનો ઓર્ડર આપ્યો છે.

કોરોનાનો હાહાકાર:બ્રિટનમાં એક જ દિવસમાં 1.20 લાખ કેસ નોંધાયા

ઓમિક્રોન વેરિઅન્ટે બ્રિટનને ભરડામાં લેતા એક જ દિવસમાં કોરોનાથી 147 લોકોનાં મોત થયા હતા. કુલ મૃત્યુઆંક 1,47,720 થયો છે. બ્રિટનમાં કોરોનાનો હાહાકાર છેલ્લાં એક સપ્તાહથી યથાવત છે. એક જ સપ્તાહમાં 887 લોકોનાં મોત કોરોનાના કારણે થયા છે. ત્યારે બીજી બાજુ યુએસ પણ કોરોનાના અજગરી ભરડાંમાં આવ્યું છે. યુ.એસ.માં કોરોનાના નવા 2,32,383 કેસો નોંધાતા કુલ કેસોની સંખ્યા વધીને 52,510,978 થઇ હતી. 1634 લોકોના મોત થતાં યુએસંમાં કોરોનાનો કુલ મરણાંક 8,33,029 થયો હતો. ન્યુયોર્કમાં કોરોનાના નવા 27,299 કેસ, ફલોરિડામાં 20,194 કેસ અને ન્યુ જર્સીમાં 11,906 કેસ નોંધાયા હતા. મિશિગનમાં નવા 8,108 કેસ નોંધાયા હતા પણ 222 જણાના મોત થયા હતા. પેન્સિલવેનિયામાં

નવા 9,838 કેસો અને 168 જણાના મોત નોંધાયા હતા. બ્રિટનમાં 24 કલાકમાં 1,19,789 નવા કેસ નોંધાયા હતા. એ સાથે જ કોરોનાના કુલ 1,17,69,921 કેસ નોંધાઈ ચૂક્યા છે. બ્રિટનમાં એક જ દિવસમાં કોરોનાથી 147 લોકોનાં મોત થયા હતા. કુલ મૃત્યુઆંક 1,47,720 થયો છે. બ્રિટનમાં કોરોનાનો હાહાકાર છેલ્લાં એક સપ્તાહથી યથાવત છે. એક જ સપ્તાહમાં 887 લોકોનાં મોત કોરોનાના કારણે થયા છે.

મુંબઈમાં ઓચિંતા કેસ વધતા લોકડાઉન જેવી સ્થિતિ થવાના એંધાણ

સ્વાસ્થ્ય નિષ્ણાતો માની રહ્યા છે કે, જાન્યુઆરીમાં કોરોનાની ત્રીજી લહેર શરૂ થઈ શકે છે. આને ધ્યાનમાં રાખીને, કેન્દ્ર અને રાજ્ય સરકારોએ મુસાફરી પ્રતિબંધો સહિત સાવચેતીનાં પગલાં લાગુ કરવાનું શરૂ કર્યું છે. નાતાલ અને નવા વર્ષની ઉજવણી અને ઉજવણીને ધ્યાનમાં રાખીને ચેપ ફેલાવાનું જોખમ છે.

ચેપના ફેલાવાને રોકવા માટે ઘણી રાજ્ય સરકારોએ ભીડવાળા મેળાવડા અને કાર્યક્રમો પર પ્રતિબંધ મૂક્યો છે. ઘણા રાજ્યોમાં નાઇટ કર્ફ્યુ લાગુ છે. ઓમિક્રોનના વધતા ખતરાને જોતા કેન્દ્ર સરકારે રાજ્યો અને કેન્દ્રશાસિત પ્રદેશોને નવી માર્ગદર્શિકા જાહેર કરી છે. વડાપ્રધાન નરેન્દ્ર મોદી ગુરુવારે આ નવા વેરિયન્ટના જોખમો પર ઉચ્ચ સ્તરીય બેઠક યોજી રહ્યા છે.

આ બેઠકમાં કોરોના સામેની તૈયારીઓની સમીક્ષા કરવામાં આવશે. તેવા સમયે મુંબઇ ઓચિંતા કોરોના કેસમાં ત્રણ ગણો ઉછાળો જોવા મળ્યો છે ત્યારે મુંબઈમાં ક્રિસમસ અને 31મી ડિસેમ્બરની જાહેરમાં ઉજવણી પર પ્રતિબંધ મૂકી દેવાયો છે. મુંબઈ પોલીસે કહ્યું છે કે, ઓમિક્રોનના વધતા જોખમને ધ્યાનમાં રાખીને શહેરમાં 16 ડિસેમ્બરથી 31 ડિસેમ્બર સુધી કલમ 144 લાગુ રહેશે. સ્વાભાવિક રીતે કલમ 144 લાગુ થવાને કારણે, નાતાલ અને નવા વર્ષની

પૂર્વ સંધ્યાએ કાર્યક્રમો, કાર્યક્રમો અને પાર્ટીઓ પર પ્રતિબંધ રહેશે. કોઈપણ સ્થાન પર, તેની ક્ષમતાના અડધા લોકોની સંખ્યાને મંજૂરી આપવામાં આવશે. ઇવેન્ટના આયોજકોએ સંપૂર્ણ રસીકરણ કરાવવું જરૂરી છે. મુંબઈ પોલીસના આદેશમાં કહેવામાં આવ્યું છે કે લોકોએ કોવિડ-19ના પ્રોટોકોલને હંમેશા ફોલો કરવાનું રહેશે. જે લોકોને સંપૂર્ણ રસી આપવામાં આવી છે તેમને જાહેર પરિવહનમાં મુસાફરી કરવાની મંજૂરી આપવામાં આવશે. મહારાષ્ટ્ર આવતા મુસાફરોએ સંપૂર્ણ રસીકરણ કરાવવું પડશે અથવા આરટી-પીસીઆર રિપોર્ટ 72 કલાક પહેલાનો હોવો જોઈએ.

ગુજરાતમાં 6 માસ બાદ કોરોનાનો ફરી રાફડો ફાટ્યો 111 પોઝિટિવ, 2 મોત

ગુજરાત રાજ્યમાં કોરોનાએ ફરી માથું ઊંચક્યું કગે. જેના કારણે ગઈ કાલે અંદાજીત 6 માસ બાદ રાજ્યમાં છેલ્લા 24 કલાકમાં કોરોનામાં વધુ 111 લોકો સંક્રમિત થયા છે. જ્યારે વધુ 2 લોકોએ સારવારમાં દમ તોડતા ફરી લોકોમાં કોરોનાનો ભય લાગી રહ્યો છે. ગુજરાતના વડોદરામાં ઓમિક્રોન વિસ્ફોટ થયો છે. જેમાં વડોદરામાં વિદેશથી આવેલા સાત લોકો ઓમિક્રોન પોઝિટિવ આવ્યા છે. જેના પગલે રાજ્યમાં ઓમિક્રોનના દર્દીઓની કુલ સંખ્યા 30 પર પહોંચી છે.

રાજ્યમાં ગુરુવારે કોરોનાના નવા 111 કેસ નોંધાયા હતા.180 દિવસ પછી રાજ્યમાં 100થી વધુ કેસ નોંધાયા છે. જ્યારે 2 દર્દીનું મોત પણ નિપજ્યું છે. જેમાં અમદાવાદમાં પાંચ માસ બાદ કોરોનાથી એક દર્દીનું મોત થયું છે. જ્યારે બીજા દર્દીનું મોત જામનગરમાં થયું છે.

સૌથી વધુ 43 કેસ અમદાવાદમાં નોંધાયા હતા. જ્યારે સુરતમાં 17, રાજકોટમાં 11, વડોદરામાં 5 નવા કેસ નોંધાયા હતા. ગુરુવારે 78 દર્દીઓને રજા આપવામાં આવી હતી. કચ્છ અને વલસાડમાં પણ 5-5 નવા કેસ નોંધાયા હતા. જ્યારે ખેડા-નવસારીમાં 4-4 નવા કેસ નોંધાયા હતા.

રાજકોટમાં એક જ પરિવારના ત્રણ સભ્યો સહિત કુલ 11 કોરોના પોઝિટિવ: ગ્રામ્ય વિસ્તારમાં 3 કેસ

ઓમિક્રોનના સંક્રમણ વચ્ચે રાજકોટ શહેરમાં કોરોનાના વધુ 11 કેસ સામે આવ્યા છે. જેમાં એક તરુણનો પણ સમાવેશ થાય છે. આ સાથે કુલ એક્ટિવ કેસની સંખ્યા 50ને પાર થઈ છે જે છેલ્લા 90 દિવસમાં સૌથી વધુ છે. શહેરના રેસકોર્સ રોડ વિસ્તારના એક જ પરિવારમાં 3 સભ્યો પોઝિટીવ આવ્યા છે.

જેમાં યુવક ચેન્નઈની કોલેજમાં ઓનલાઈન અભ્યાસ કરે છે. જ્યારે તરુણ રાજકુમાર કોલેજમાં છે. તેણે તાજેતરમાં જ સીબીએસઈ બોર્ડની લેવાયેલી પરીક્ષા આપી હતી અને ત્યારબાદ બંને ભાઈઓ અને તેના મિત્રો ગોવા ફરવા માટે ગયા હતા. ફરીને પરત આવ્યા બાદ બંને પોઝિટિવ આવ્યા છે. રાજકોટ જિલ્લામાં કોરોનાના ત્રણ કેસ નોંધાયા છે.

ત્રણેય લોકોની કોઈ ટ્રાવેલ હિસ્ટ્રી નથી. ધોરાજી તાલુકાના સુપેડી ગામમાં 75 વર્ષીય વૃદ્ધ સંક્રમિત થયા છે. તેઓના બુધવારે પોઝિટિવ આવેલા વૃદ્ધાના હાઈરિસ્ક કોન્ટેક્ટ તરીકે નોંધાયેલા હોવાથી સેમ્પલ લીધા હતા. જેમાં પોઝિટિવ આવ્યા છે. બીજો ધોરાજી તાલુકાના સુપેડી ગામમાં જ રહેતા 59 વર્ષીય વૃદ્ધનો નોંધાયો છે. ત્રીજો કેસ ગોંડલના  70 વર્ષીય વૃદ્ધનો રિપોર્ટ  પોઝિટિવ આવ્યો છે.

તો બીજી તરફ સૌરાષ્ટ્રમાં મેડિકલ ક્ષેત્રે કેન્દ્ર સ્થાન પર રહેલી સિવિલ હોસ્પિટલના કોવિડ બિલ્ડિંગમાં પણ દર્દીઓની સંખ્યા વધતી જોવા મળી રહી છે. હાલ સિવિલ હોસ્પિટલમાં કોવિડ બિલ્ડિંગમાં 9 દર્દીઓની કોરોના હેઠળ સારવાર ચાલી રહી છે. જેમાં 6 દર્દીઓ ઓમિક્રોન હેઠળ સારવાર લઈ રહ્યાનું જાણવા મળી રહ્યું છે.

રસીકરણમાં ભારતની સિદ્ધિ 60% વસ્તી સંપૂર્ણ વેકસીનેટેડ

ભારતના 60% થી વધુ વયસ્કોને હવે એન્ટી-કોવિડ જેબ્સના બે ડોઝ સાથે સંપૂર્ણ રસી આપી દેવામાં આવી છે, જ્યારે લગભગ 89% લોકોને ઓછામાં ઓછો પ્રથમ ડોઝ આપી દેવાયો છે. 16 જાન્યુઆરીએ રસીકરણ કાર્યક્રમ શરૂ થયો ત્યારથી સમગ્ર દેશમાં કુલ 140 કરોડથી વધુ ડોઝનું સંચાલન કરવામાં આવ્યું છે.

કેન્દ્રીય આરોગ્ય પ્રધાન મનસુખ માંડવિયાએ ગુરુવારે જણાવ્યું હતું કે, 60 ટકાથી વધુ વસ્તીને કોરોના વિરોધી સંપૂર્ણ રસી આપવામાં આવી છે. મનસુખ માંડવિયાએ એક ટ્વીટ કરીને કહ્યું હતું કે, ’વધુ એક પરાક્રમ પૂરો કરવા બદલ ભારતને અભિનંદન. જનભાગીદારી અને અમારા આરોગ્ય કર્મચારીઓના સમર્પિત પ્રયત્નોથી 60 ટકાથી વધુ વસ્તીએ હવે સંપૂર્ણ રસીકરણ મેળવી લીધું છે.’ ઉપરાંત, સ્વાસ્થ્ય મંત્રાલયના અધિકારીઓના જણાવ્યા અનુસાર ભારતના લગભગ 89 ટકા પુખ્ત વયના લોકોને પ્રથમ ડોઝ આપવામાં આવ્યો છે.

સાવધાન! સંક્રમણની ગતિ વધતા દેશમાં ઓમિક્રોનના દૈનિક કેસનો આંક 300ને પાર!!

દેશમાં સતત વધતા ઓમિક્રોન કેસના આંક હવે વધારે ડરાવી રહ્યા છે. એક તરફ કોરોનાના કેસમાં ઘટાડો થતા લોકો ઘરમાંથી નીકળ્યા બાદ એ રીતે ફરતા દેખાય છે કે જાણે તેમની વચ્ચે હવે કોરોના રહ્યો જ નથી. પરંતુ દેશમાં ઓમિક્રોનના કેસની શરુઆત થયા બાદ હવે આંકડો 300ને પાર થઈ ગયો છે.

એક જ દિવસની અંદર નવા 84 ઓમિક્રોનના કેસ નોંધાયા છે. આ પહેલા મંગળવારે એક જ દિવસમાં ઓમિક્રોનના સૌથી વધારે 44 કેસ નોંધાયા હતા. નવા 84 કેસના વધારા સાથે ભારતમાં ઓમિક્રોનના કુલ કેસની સંખ્યા 341 પર પહોંચી ગઈ છે.

નવા નોંધાયેલા ઓમિક્રોનના કેસમાં સૌથી વધારે ગુરુવારે 33 કેસ તામિલનાડુમાં નોંધાયા છે, જ્યારે મહારાષ્ટ્રમાં નવા 23 કેસ અને કર્ણાટકમાં 12 લોકો સંક્રમિત થયા છે. ગુજરાત અને દિલ્હીમાં 7-7 લોકો ઓમિક્રોન પોઝિટિવ આવ્યા છે. જ્યારે ઓડિશામાં બે લોકો નવા વેરિયન્ટથી સંક્રમિત થયા છે.