કોન્ટ્રાક્ટરે ગર્લફ્રેન્ડના પતિની હત્યા માટે કોન્ટ્રાકટ આપ્યો!
મૃતકની પત્નીના બોયફ્રેન્ડે માતાજીના ભુવાને સોપારી આપી કાવતરાને અંજામ આપ્યો: બાંધકામના ધંધાર્થી સહિત પાંચ સકંજામાં
ટ્રેનની ઠોકરે મૃત્યુ થયાની અને દારૂના ડખ્ખામાં ખૂન કર્યા બનાવમાં આવ્યો નવો વળાંક
કોઠારિયા સોલવન્ટ પાસે આવેલી સિતારામ સોસાયટીના યુવાનની લોહીલુહાણ હાલતમાં કોઠારિયા સોલવન્ટ પાસે રેલવે ટ્રેક પરથી લાશ મળી આવી હતી. ટ્રેનની ઠોકરે ઘવાતા મોત નીપજયાનું જાહેર થયા બાદ હત્યામાં સંડોવાયેલા શખ્સને રાત્રે ડરામણા સપના આપતા બનાવ હત્યાનો હોવાનું બહાર આવ્યા બાદ ક્રાઇમ બ્રાન્ચ દ્વારા કરાયેલી તપાસમાં મૃતકની પત્નીના બોયફ્રેન્ડે માતાજીના ભુવાને સોપારી આપી હત્યા કરાવ્યાની ચોકાવનારી વિગત પ્રકાશમાં આવતા સનસનાટી મચી ગઇ છે. પોલીસે સોપારી આપી હત્યાના બનાવને અંજામ આપનાર બાંધકામના ધંધાર્થી સહિત પાંચ શખ્સોની અટકાયત કરી તપાસ હાથધરી છે.
આ અંગેની પોલીસમાંથી પ્રાપ્ત વિગત મુજબ સિતારામ સોસાયટીમાં રહેતા મનોજ પ્રતાપભાઇ વાઢેર નામના યુવાનની દસેક દિવસ પહેલાં કોઠારિયા સોલવન્ટ પાસે રેલવે ટ્રેક પરથી લોહી લુહાણ હાલતમાં લાશ મળી આવતા મનોજ વાઢેર ટ્રેનની ટોકરે ઘવાતા ઇજા થયાના અનુમાન સાથે એકસિડન્ટ ડેથ (એડી)ની નોંધ કરી તપાસ હાથધરી હતી અને પોસ્ટમોર્ટમ રિપોર્ટમાં પણ બોર્થડ પદાર્થની ઇજા હોવાનો તબીબ દ્વારા અભિપ્રાય આપવામાં આવ્યો હતો.
દરમિયાન પારડી ગામના રાજેશ પરમારને હત્યા અંગે ડરામણા સપના આવતા હોવાનું પોતાના ભુવા મેહુલ પારઘીને મનોજ વાઢેરની હત્યા અંગે વાત કરી હતી. માતાજીના ભુવા મેહુલ પારઘીએ માતાજી આ બનાવમાં કંઇ ન કરે જે કંઇ કરવાનું છે તે તારે જ કરવાનું કહેતા રાજેશ પરમાર ત્યાંથી જતો રહી પોતાના પરિવારને જાણ કરી હતી તેઓએ આ અંગે પોલીસ બાતમી મળતા આજી ડેમ પોલીસે રાજેશ પરમારની અટકાયત કરી પૂછપરછ કરતા તેને દારૂની પોટલીના પ્રશ્ર્ને મનોજ વાઢેર સાથે ઝઘડો થતા પથ્થરના ઘા માર્યાની કબુલાત આપતા આજી ડેમ પોલીસે મૃતક મનોજ વાઢેરની પત્ની ફાલ્ગુનીની ફરિયાદ પરથી રાજેશ પરમાર સામે હત્યાનો ગુનો નોંધી ધરપકડ કરી હતી.
દારૂની એક કોથડીના કારણે હત્યા થયાની સ્ટોરી ક્રાઇમ બ્રાન્ચને ગળે ન ઉતરતા આ અંગે ઉંડી છાનભીન કરતા હત્યા સોપારી આપી કરાવવામાં આવ્યાનું અને માતાજીના ભુવા સહિત પાંચ શખ્સોની સંડોવણી હોવાનું બહાર આવ્યું હતું.
મૃતક મનોજ વાઢેરની પત્ની ફાલ્ગુનીને બાંધકામ કોન્ટ્રાકટર પરેશ પટેલ સાથે મૈત્રી કરાર કર્યો હતો તેમ છતાં મનોજ વાઢેર દારૂના નશામાં પોતાની પત્ની ફાલ્ગુનીને મારકૂટ કરતો હોવાની વાત પરેશ પટેલને કરતા તે ઉશ્કેરાયો હતો અને મનોજ વાઢેરની હત્યા માટે પારડી ગામે માતાજીના ભુવા મેહુલ પારઘીને વાત કરી હતી પણ તેને મનોજ વાઢેરની હત્યાની ના કહી હતી.
મનોજ વાઢેર પોતાની પત્ની ફાલ્ગુનીને વધુ ત્રાસ દેતો હોવાથી કાયમી છુટકારા માટે ફરી ભુવા મહેલુ પારઘીને મળતા તેને પોતાના સંબંધી રાજેસ પરમારને હત્યા માટે કામ સોપ્યું હતું. રાજેશ પરમારે દારૂનો નશો કરી મનોજ વાઢેરને પથ્થરના ઘા મારી હત્યા કર્યાનો સમગ્ર પ્રકરણમાં નવો વળાંક આવતા ક્રાઇમ બ્રાન્ચના સ્ટાફે મૃતક મનોજ વાઢેરની પત્ની ફાલ્ગુની, તેનો બોયફ્રેન્ડ પરેશ પટેલ, માતાજીના ભુવા મેહુલ પારઘી સહિતના શખ્સોની અટકાયત કરી પૂછપરછ હાથધરી છે.
