અંતથી જ પ્રારંભ: એક એવું બાળક કે જેને ફક્ત 13 વર્ષની ઉમરે જ 125 ફ્રેક્ચર થઈ ગયેલા !!

એક એવું બાળક કે જેને ફક્ત 13 વર્ષની ઉમરે જ 125 ફ્રેક્ચર થઈ ગયેલા!

દરેક માણસને પોતાના દુ:ખનું પોટલું બીજા કરતાં સો ગણું વધારે ભારે લાગે છે. તને શું ખબર પડે મારી જીંદગીમાં કેટલા દુ:ખ છે? જેવા વાકયોથી આપણે દરરોજ કેટલાક સાથીમિત્રોને અપમાનિત કરીએ છીએ. દુ:ખના ગુલબાંગો પોકારનારની આપણે ત્યાં જરાય કમી નથી. 13 વર્ષનું એક બાળક, જેની જિંદગીમાં ભગવાન કદાચ તન-દુરસ્તી નામનો શબ્દ ઉમેરવાનું જ ભૂલી ગયો છે. પરંતુ મન-દુરસ્તી ઠાંસી – ઠાંસીને ભરી બેઠો છે! જેને-જેને પોતાનું દુ:ખ દુનિયાભરનાં લોકો કરતાં વધુ લાગે છે તેવાં લોકોના સ્વમાનને આ વાત ઠેંસ પહોંચાડી શકે એમ છે! પરંતુ માનવતાને ફરી બેઠી કરવા માટે મૃતસંજીવનીનાં આટલાં કડવા ઘુંટડા પીવાની તૈયારી તો રાખવી જ પડશે.

સ્પર્શ શાહ એનું નામ! મૂળમાં તો ગુજરાતી લોહી પણ જન્મ, અમેરિકાનાં ન્યુજર્સી ખાતે આવેલાં આઈસલિનમાં! માતા જિગીશા શાહ અને પિતા હિરેન શાહને તો સ્વપ્નેય ખ્યાલ નહી હોય કે જન્મતાંવેત જે બાળક કુદરતની ક્રુરતાનું ભોગ બન્યુ છે એ આગળ જતાં એમનું નામ સોનેરી અક્ષરોમાં ચમકાવશે. 2002ની સાલમાં હિરેન અને જિગીશા શાહ બન્ને ન્યુજર્સી શિફટ થયેલાં અને 2003માં સ્પર્શનો જન્મ! શાહ પરિવારમાં પુત્રપ્રાપ્તિને કારણે પહેલાં તો ખુશીની લહેર વ્યાપી ગઈ પરંતુ જયારે ડોકટર્સએ રૂ જેવા એ પોચા બાળકનું નિદાન કર્યું ત્યારે તેમના માથે જાણે આભ તુટી પડયું. આંખો પણ માંડ-માંડ ખોલી શકતું એ નાનકડું બાળક ઓસ્ટિયો જેનેસિસ ઈમ્પરફેકટા નામના એક જન્મજાત રોગનું શિકાર હતું!

સરળ ભાષામાં સમજવું હોય તો ઓસ્ટિયો જેનેસિસ ઈમ્પરફેકટા હાડકાંનો રોગ છે જેમાં શરીરના તમામ હાડકા અત્યંત બરડ બની જાય છે, બટકણાં થઈ જાય છે. જરાક વધારે જોરથી હસ્તધુનન પણ કરવામાં આવે તો તરત હાડકા બટકવાનો અવાજ આવે એવો આ રોગ! દર એક લાખ લોકોએ છ કે સાત વ્યકિતઓમાં જવલ્લે જ જોવા મળતા આ રોગ માટે ની કોઈ દવા હજુ સુધી શોધાઈ નથી. સ્પર્શ શાહ જન્મથી આ જ રોગનો શિકાર બન્યો છે. કુલ 40 ફ્રેક્ચર સાથે જન્મેલા સ્પર્શના આટલા વર્ષોમાં 125થી વધુ ફ્રેકચર થઈ ચુકયા છે. (આપણને એક ફ્રેકચર થાય ને સાહેબ, તોય આંખમાંથી પીલુડા પડવા લાગે છે. ઉપરવાળાને ઢગલો ગાળો આપીને આપણે એ દર્દ ઓછું કરવાનો પ્રયત્ન કરીએ છીએ. જયારે માત્ર 13 વર્ષની નાની ઉંમરમાં 125 ફ્રેકચર જોઈ ચુકેલો આ બાળક હસતાં મોં એ પોતાની પીડાનો સ્વીકાર કરે છે! માત્ર સ્વીકાર જ નહિં, ઈશ્વરે જીવવા માટે આટલી સરસ જીંદગી આપી એ બદલ ખરા દિલથી આભાર માને છે.) આખા શરીરનો વજન પગ પર આવે તો તરત જ તેના પગનાં બધા હાડકા બટકી જાય, આથી સ્પર્શને સમગ્ર જીવન વ્હીલચેર પર બેસીને જ વિતાવવું પડશે. ડોકટરો તરફથી તેને હાલવા-ચાલવા અંગે સદંતર મનાઈ ફરમાવી દેવામાં આવી છે.

કહેવાય છે ને કે, ઈશ્વર એક ઈન્દ્રિય છીનવી લે તો સામે બીજી ઈન્દ્રિયોમાં બમણી તાકાત ભરી દે છે. એવું જ કંઈક સ્પર્શ સાથે પણ થયું. સાડા ત્રણ વર્ષનાં સ્પર્શને લઈને તેના મમ્મી-પપ્પા એક દિવસ કારમાં મુસાફરી કરી રહયા હતા હિરેનભાઈએ કારનો રેડીયો ચાલુ કર્યો. બનેના આશ્ચર્યની વચ્ચે રેડિયો પર વાગી રહેલું ગીત સ્પર્શને શબ્દશ: આખું યાદ રહી ગયું અને તે મોટેથી ગણગણવા લાગ્યો. હિરેનભાઈને એવું લાગ્યું કે આ ગીત કદાચ તેને પહેલેથી આવડતું હશે એટલે તેમણે રેડિયો પર બીજુ, ત્રીજુ અને ચોથું ગીત વગાડયું. આ બધા ગીત પણ સ્પર્શે તુરંત જ ગાઈ સંભળાવ્યા. હવે બંનેને ખાતરી થઈ ગઈ કે નકકી સ્પર્શને સંગીત સાથે ભારે લગાવ છે. તે દી’ની ઘડી અને આજનો દિવસ, સ્પર્શે પાછુ જોયા વગર સંગીતને પોતાની આરાધના બનાવી લીધી.

નાનપણથી જ પિયાનો કી-બોર્ડ વાદક સ્પર્શ શાસ્ત્રીય સંગીતની તાલીમ લે છે. તેના 10થી વધુ ગીતો આંતરરાષ્ટ્રિય સ્તરે લોન્ચ થઈ ચૂક્યા છે. આખી દુનિયા તેનાં સંગીતની પાછળ પાગલ છે. અમેરિકા, બ્રિટન, ભારત સહિત દુનિયામાં અનેક ભાગોમાં પોતાની અમીર છાપ છોડી ચુકેલો આ બાળક છેલ્લા ત્રણેક વર્ષમાં 45 થી વધુ પર્ફોમન્સ આપી ચૂકયો છે. અને હવે તે અમેરિકન મ્યુઝિકની તાલીમ પણ લઈ રહયો છે.

2 જાન્યુઆરી, 2016નાં રોજ સ્પર્શે લોન્ચ કરેલ ‘નોટ અફ્રેઈડ’ ગીતે તેની જિંદગી પલટાવી નાંખી; હોલિવૂડ પોપસ્ટાર એમિનમનાં નોટ અફ્રેઈડ ગીતને નવેસરથી ભારતીય ટચ આપીને તેણે પોતાની યુ-ટયુબ ચેનલ પર અપલોડ કર્યું. દરેક નેશનલ ઈન્ટરનેશનલ અખબાર અને મીડિયાએ આની નોંધ લીધી. આ સાથે જ કુદરતનાં ભદ્દા મજાકનો ભોગ બનેલા સ્પર્શનાં જીવનમાં સમૂળગુ પરિવર્તન આવ્યું. 10થી વધુ ઈન્ટરનેશનલ એવોર્ડ અત્યારે એના ખાતામાં બોલે છે.

સોશિયલ મીડિયા પર 6 કરોડથી વધુ લોકોએ તેનું ગીત સાંભળ્યું છે અને હાલમાં અલગ-અલગ રેડિયો-સ્ટેશન, ઈવેન્ટ, તેમજ ટીવી-શોમાં અસંખ્ય નબળાઇઓ સાથે જનમેલો સ્પર્શ શાહ આજે એક ઈન્ટરનેશનલ સ્ટાર બની ગયો છે.

દરેક જગ્યાએ સ્પર્શ પોતાની ઓળખાણ પ્યોરિધમ (પ્યોર+રિધમ) તરીકે આપે છે. સુરોની પવિત્રતા જાળવનાર આ ટીનજરે કેટલાક ભારતીય ગીતો પણ ગાયા છે જેમાં અલબેલા સજન આયો રે અને એક પ્યાર કા નગમા હૈ નો સમાવેશ થાય છે તે બે પ્રકારનાં સંગીતનું મિશ્રણ કરે છે : રાગારેપ! ભારતનું શાસ્ત્રીય સંગીત રાગ અને અમેરિકન હિપહોપ-રેપનું સંમિશ્રણ એટલે રાગારેપ…. જે સ્પર્શ શાહની ખાસિયત છે. સમગ્ર દુનિયા તેના આ અનન્ય મિશ્રણ રાગારેપ પાછળ ઘેલી છે. વર્લ્ડ ટુ2 ગેમ દરમિયાન મેડીસન સ્કવેર ગાર્ડન ખાતે ચાલી રહેલા કોન્સર્ટમાં સ્પર્શને ગોડ બ્લેસ અમેરિકા ગાવા માટે આમંત્રણ આપવામાં આવ્યું હતું.

વાત માત્ર આટલે જ નથી અટકતી! સ્પર્શ ભણવામાં પણ એકકો! ગણિતમાં આવતાં પાઈની કિંમત કોઈ આપણને પૂછે તો એનો જવાબ આપણે 3.14 જ આપીશું! પરંતુ આ જ કિંમતમાં કુલ 250 આંકડાઓ સ્પર્શને કડકડાટ મોઢે છે. અંગ્રેજી શબ્દ કોષનાં લાંબામાં લાંબા 62 અઘરા શબ્દોને સ્પર્શ માત્ર 18 સેક્ધડમાં બોલી જાણે છે. અંગ્રેજી ભાષાની ચાર અલગ – અલગ લઢણમાં વાત કરી શકે છે, અને આવું તો બીજુ ઘણુ બધુ…! માત્ર 6 વર્ષની ઉંમરમાં સ્પર્શ 45 અક્ષરોનાં લાંબા-લચક શબ્દને વગર અટક્યે સંભળાવી શકતો હતો (હવે વિચાર કરો, 6 વર્ષની ઉંમરમાં આપણે આવા શબ્દો બોલવાની વાત તો દૂર, બરાબર વાંચી પણ નહોતા શકતાં!). હાલમાં સ્કૂલમાં અપાતા હોમવર્ક પણ સ્પર્શ જાતે જ કરે છે. આ માટે તેનાં મમ્મી-પપ્પા તેને માત્ર લખવામાં મદદ કરે છે, કેમકે તે પેન-પેન્સીલ હાથમાં પકડીને લખવા જાય તો હાડકાં પર વજન આવે આથી એ જોખમ ન લઈ શકાય. કયારેક તે વોઈસ ટુ ટેકસ્ટ ટેકનોલોજીનો ઉપયોગ કરીને પોતાનું કામ પુરૂ કરે છે. સ્પર્શનો એક પાંચ વર્ષનો નાનકડો ભાઈ પણ છે જે તદ્દન સ્વસ્થ-નોર્મલ છે અને દરરોજ સ્પર્શની સાથે વિડીયો ગેમ રમે છે.

સ્પર્શ ભૂતકાળમાં વિવિધ સેવાભાવી સંસ્થાઓ માટે અંદાજે પાંચ લાખ ડોલરનું ભંડોળ એકઠું કર્યું હતું. આ ઉપરાંત તે પોતાના તરફથી ચેરીટી કરવામાં પણ માને છે. સ્પર્શને હજુ ભવિષ્યમાં પણ અઢળક ફેકચર થવાની શકયતા છે તેવું ડોકટર જણાવે છે. જયારે પણ સ્પર્શને ફ્રેક્ચર વખતે થતાં દર્દ વિશે પુછવામાં આવે તો એવું જ કહે છે. તમને થતી પીડા વિશે તમે ખાસ કશું નથી કરી શકતાં. પીડાની લાગણી અનુભવીને રડવું એ સ્વાભાવિક પ્રતિક્રિયા છે… બટ યુ નીડ ટુ સ્માઈલ! હું સાવ નાનો હતો ત્યારે ફેકચરનાં ઓપરેશન વખતે દરેક સમયે મારા પિતા મને આ જ શીખ આપતાં કે જો તું તારા હાડકાને સ્મિત નહી આપે તો તારું દર્દ પણ તને હળવું નહીં જ લાગે! આથી હવે ફ્રેક્ચર થયા પછી જયારે એક્સ-રે મારા હાથમાં આવે છે ત્યારે હું તેમના તરફ જોઈએ એક જ વસ્તુ કહું છું…. સ્માઈલ પ્લીઝ બોન્સ!! બોસ, આ વસ્તુ વાંચીને આપણો સૌએ એક વાત બરાબર સમજવા જેવી છે કે ઈશ્વ2 કોઈનેય કામ વગર આ પૃથ્વી પર જનમ નથી જ આપતો! દરેકને વત્તા-ઓછા પ્રમાણમાં પોતાની પરેશાનીઓ છે, મુશ્કેલીઓ છે પણ એનાં પ્રત્યે આંખ આડા કાન કરીશું તો આ સમાજ વધુ બહેતર બની શકશે… અને કદાચ રહેવાલાયક પણ!

ઉપરવાળો ભલે બહુ બધા સ્પર્શનું સર્જન ના કરતો હોય, પણ ખરેખર સ્પર્શ જેવા વ્યકિતત્વો જ આ દુનિયાને પ્રેરણા પૂરી પાડે છે. પોતાનાં જેવા હજારો લોકો પ્રત્યે માનવતા દેખાડીને, તેમને આર્થિક-માનસિક મદદ કરી કરીને સ્પર્શએ તો કરોડોનાં દિલ સ્પર્શી લીધા છે પરંતુ સાવ તંદુરસ્ત થઈને પણ આપણા વેંત જેવડા દુ:ખના રોદણા રોવાનું આપણે કયારે બંધ કરીશું….!?

વાઇરલ કરી દો ને

શું અશક્ત હોવાથી આપણે નિષ્ફળ બની જઈએ છીએ? ગૂગલ પર સર્ચ કરીએ તો ઢગલાબંધ ઉદાહરણ મળશે જે સદંતર ઇનકાર કરે છે

તથ્ય કોર્નર

સ્પર્શ શાહે લગભગ સાડા સાત વર્ષ કરતાં પણ વધુ સમય સુધી ભારતીય સંગીતશાસ્ત્ર શીખ્યું છે અને સાથે સાથે અમેરિકન મ્યુઝિકમાં પણ પાવરધો છે!