પુત્રના ઘરે આંટો દેવા આવેલા દંપતી ખંડીત થતા પરિવારમાં અરેરાટી
મુળ ભાણવડ તાલુકાના વેરાર ગામે રહેતા વૃદ્ધ દંપતી અહીંની કોઠારીયા રોડ પર પુત્રના ઘરે આવ્યા હતા જયાંથી ગોંડલ રોડ પીરવાડ પાસે સગાના ઘરે જવા માટે રીક્ષા પકડવા રોડ ક્રોસ કરતા હતા તે દરમિયાન ટ્રક ચાલકે વૃદ્ધ દંપતીને ઠોકરે લેતા ગંભીર રીતે ઘવાયેલા વૃદ્ધાનું મોત નિપજતા દંપતિ ખંડિત થયું હતું. જયારે વૃદ્ધને સારવારમાં ખસેડવામાં આવ્યા હતા.
આ અંગે પ્રાપ્ત વિગત મુજબ મુળ ભાણવડ તાલુકાના વેરાર ગામે રહેતા વલ્લભજીભાઈ વાલજીભાઈ સોનાગ્રા (ઉ.વ.૬૫) અને તેમના પત્નિ મંજુબેન વલ્લભભાઈ સોનાગ્રા (ઉ.વ.૬૦) ગઈકાલે અહીં કોઠારીયા રોડ પર સનાતન પાર્ક-૩માં રહેતા પોતાના પુત્રના ઘરે આવ્યા હતા. અહિંયાથી સગા સંબંધીના ઘરે આંટો દેવા જતા માટે વૃદ્ધા દંપતી ગોંડલ રોડ પીરવાડ પાસે રીક્ષામાં બેસવા રોડ ક્રોસ કરી રહ્યા હતા તે દરમિયાન જી.જે.૧૨ એવી ૫૬૩૪ નંબરના ટ્રક ચાલકે વૃદ્ધ દંપતીને હડફેટે લીધા હતા.
ગંભીર રીતે અકસ્માતમાં ઘવાયેલા મંજુબેન સોનાગ્રાનું ઘટના સ્થળ પર જ મોત નિપજયું હતું. જયારે વલ્લભભાઈ સોનાગ્રાને સારવાર અર્થે હોસ્પિટલમાં દાખલ કરવામાં આવ્યા હતા. પોલીસે ઘટનાની નોંધ કરી મૃતદેહ પોસ્ટમોર્ટમ અર્થે ખસેડી ટ્રક ચાલક વિરુઘ્ધ ગુનો નોંધી વધુ તપાસ હાથધરી છે.
