- 2023માં વૈશ્ર્વિક આતંકી જાહેર થયેલો અબ્દુલ હાર્ટએટેકનો શિકાર
મુંબઈ હુમલાનો માસ્ટરમાઇન્ડ હાફિઝ સઈદનો સાળો અને કાવતરું ઘડનાર આતંકવાદી અબ્દુલ મક્કીનું હૃદયરોગના હુમલાથી મોત થયું છે. મક્કી છેલ્લા કેટલાક દિવસોથી બીમાર હતો. હાઈ સુગરના કારણે લાહોરની એક ખાનગી હોસ્પિટલમાં તેની સારવાર ચાલી રહી હતી.
અબ્દુલ મક્કી આતંકી સંગઠન જમાત–ઉદ–દાવાનો નાયબ ચીફ પણ હતો. 2020માં તેને આતંકવાદી ભંડોળ માટે અદાલત દ્વારા 6 મહિનાની સજા પણ કરવામાં આવી હતી. સજા બાદ તેણે પોતાની જાતને લો પ્રોફાઇલ રાખી હતી. 2023માં સંયુક્ત રાષ્ટ્રએ તેને વૈશ્વિક આતંકવાદી જાહેર કર્યો હતો.અબ્દુલ રહેમાન મક્કીને હાફિઝ અબ્દુલ રહેમાન મક્કી તરીકે પણ ઓળખવામાં આવે છે. તેનો જન્મ પાકિસ્તાનના પંજાબ પ્રાંતના બહાવલપુરમાં થયો હતો. મક્કી લાંબા સમયથી હાફિઝ સઈદની નજીક હતો. તે લશ્કર અને જમાત–ઉદ–દાવામાં ઘણા મહત્વના પદો પર રહી ચૂક્યો છે. મક્કીએ રાજકીય વડા અને લશ્કર માટે ભંડોળ એકત્ર કરવા જેવા કાર્યો પણ સંભાળ્યા. તે લશ્કરની ગવર્નિંગ બોડી શૂરાનો સભ્ય પણ હતો.
મક્કીને 2000માં લાલ કિલ્લા અને 2008માં મુંબઈમાં થયેલા આતંકવાદી હુમલા માટે ભારતીય એજન્સીઓ દ્વારા આરોપી ગણવામાં આવ્યો હતો. યુએસ નાણા વિભાગે તેને 2010માં વૈશ્વિક આતંકવાદીઓની યાદીમાં સામેલ કર્યો હતો.રિવોર્ડ ફોર જસ્ટીસ પ્રોગ્રામ હેઠળ અમેરિકાએ મક્કી પર 2 મિલિયન ડોલરનું ઈનામ રાખ્યું હતું અને તેને સજા અપાવવા માટે લોકો પાસેથી માહિતી માગી હતી.
2022માં ભારત અને અમેરિકાએ સંયુક્ત રીતે યુએન નિયમ 1267 હેઠળ તેને વૈશ્વિક આતંકવાદી જાહેર કરવાનો પ્રસ્તાવ મૂક્યો હતો. જોકે ચીને તેના પર પ્રતિબંધ મૂક્યો હતો. આ પછી ચીને જાન્યુઆરી 2023માં તેના પરનો પ્રતિબંધ હટાવી લીધો હતો. આ પછી મક્કીને વૈશ્વિક આતંકવાદી યાદીમાં મૂકવામાં આવ્યો હતો.
