રૂપિયો મજબૂત થઈ રહ્યો છે…
છેલ્લા 15 મહિનાનો સૌથી મોટો ઉછાળો, વિદેશી હૂંડિયામણ 44 લાખ કરોડને પાર : સોનાના રિઝર્વમાં ઘટાડો નોંધાયો
25 નવેમ્બરે પૂરા થયેલા સપ્તાહ દરમિયાન દેશના વિદેશી મુદ્રા ભંડારમાં સતત ત્રીજા સપ્તાહમાં વધારો થયો છે. સપ્તાહ દરમિયાન વિદેશી મુદ્રા ભંડાર 2.9 બિલિયન ડોલર એટલે કે 23 હજાર કરોડ વધીને 550.14 બિલિયન ડોલર એટલે કે 44 લાખ કરોડ પર પહોંચી ગયો છે. રિઝર્વ બેંક ઓફ ઈન્ડિયાએ શુક્રવારે આ જાણકારી આપી. આરબીઆઈના ડેટા અનુસાર, 18 નવેમ્બરે પૂરા થયેલા સપ્તાહમાં વિદેશી મુદ્રા ભંડાર ઓગસ્ટ 2021 પછી દેશના વિદેશી હૂંડિયામણ ભંડારમાં આ સપ્તાહે સૌથી ઝડપી વધારો જોવા મળ્યો છે.
આ સિવાય સોનાના ભંડારનું મૂલ્ય 73 મિલિયન ડોલર ઘટીને 39.938 બિલિયન ડોલર થયું છે. ડેટા અનુસાર, સ્પેશિયલ ડ્રોઈંગ રાઈટ્સ 25 મિલિયન ડોલર ઘટીને 17.88 બિલિયન ડોલર થઈ ગયા છે. માહિતી અનુસાર, ઇન્ટરનેશનલ મોનેટરી ફંડ પાસે દેશનું ચલણ અનામત પણ સમીક્ષા હેઠળના સપ્તાહમાં 14 મિલિયન ડોલર ઘટીને 5.03 બિલિયન ડોલર થયું છે.
જો કે બજારમાં અત્યારે રૂપીયો મજબૂત સ્થિતિમાં છે. સ્થાનિક બજારોમાં નબળા ડોલર અને ક્રૂડ ઓઈલના ભાવમાં વધારાને કારણે શુક્રવારે રૂપિયો સાત પૈસા ઘટીને 81.33 પર બંધ થયો હતો. વિદેશી ભંડોળના વધતા પ્રવાહે પણ રોકાણકારોના સેન્ટિમેન્ટને અસર કરી છે. નબળા યુએસ ડોલર ઇન્ડેક્સે રૂપિયાને ટેકો આપ્યો હતો. જોકે, નબળા સ્થાનિક બજાર, ક્રૂડ ઓઈલના ભાવમાં વધારો અને એફઆઈઆઈના આઉટફ્લોને કારણે રૂપિયો થોડો દબાણમાં બંધ થયો હતો.આ દરમિયાન, છ મુખ્ય કરન્સી સામે ડોલરની મજબૂતાઈ અથવા નબળાઈ દર્શાવતો ડોલર ઈન્ડેક્સ 0.18 ટકા ઘટ્યો હતો.
ડિજિટલ રૂપિયો ગેમ ચેન્જર સાબિત થશે : એસબીઆઈ ચેરમેન
એસબીઆઈના ચેરમેન દિનેશ ખરાએ શુક્રવારે જણાવ્યું હતું કે રિટેલ ડિજિટલ રૂપિયા માટે રિઝર્વ બેંકનો પ્રથમ પાયલોટ પ્રોજેક્ટ સ્થાયી અસરો સાથે “ગેમ ચેન્જર” સાબિત થશે. જે ખૂબ ઓછા ખર્ચે વધુ સારી નાણાકીય ટ્રાન્સમિશનની ખાતરી કરશે. સેન્ટ્રલ બેંક ડિજિટલ કરન્સી રિટેલ ડિજિટલ રૂપિયા માટે આરબીઆઈનો પાયલોટ પ્રોજેક્ટ મુંબઈ, નવી દિલ્હી, બેંગલુરુ અને ભુવનેશ્વરમાં ગુરુવારે શરૂ થયો હતો અને સ્ટેટ બેંક ઑફ ઈન્ડિયા સહભાગી બેંકોમાંની એક છે. રિટેલ ડિજિટલ રૂપિયો પ્રોજેક્ટ ચાર ધિરાણકર્તાઓ – સ્ટેટ બેંક ઓફ ઈન્ડિયા, આઇસીઆઇસીઆઇ બેંક, યસ બેંક અને આઇડીએફસી ફર્સ્ટ બેંક સાથે જોડાણથી ચલણમાં આવ્યો છે. ડિજિટલ રૂપિયાના ઉપયોગથી ભૌતિક ચલણના સંચાલન સાથે સંકળાયેલા ઓપરેશનલ ખર્ચમાં ઘટાડો થવાની સાથે સાથે અર્થતંત્રમાં નાણાકીય સમાવેશમાં વધારો થવાની અપેક્ષા છે.
