- અકસ્માતના વધતા બનાવો ચિંતાજનક: દેશમાં માર્ગ અકસ્માતમાં દર 10,000 કિલોમીટરે 250 લોકોએ જીવ ગુમાવ્યો
માર્ગ અકસ્માતને લગતા મૃત્યુના તાજેતરના આંકડા ચોંકાવનારા છે. છેલ્લા એક દાયકામાં એટલે કે 2014 થી 2023 વચ્ચે લગભગ 15.3 લાખ લોકો માર્ગ અકસ્માતમાં મૃત્યુ પામ્યા છે. આ આંકડો કેન્દ્રશાસિત પ્રદેશ ચંદીગઢની વસ્તી કરતા વધુ છે. કેન્દ્ર સરકારે માર્ગ અકસ્માતમાં થતા મૃત્યુને ઘટાડવા માટે તેની પ્રતિબદ્ધતાનો વારંવાર પુનરોચ્ચાર કર્યો છે અને સુપ્રીમ કોર્ટે પણ આવા મૃત્યુને રોકવા માટે દરમિયાનગીરી કરી છે. જો કે, કેન્દ્રીય માર્ગ પરિવહન મંત્રાલયના ડેટા દર્શાવે છે કે દેશમાં માર્ગ અકસ્માતમાં દર 10,000 કિલોમીટરે 250 લોકોએ જીવ ગુમાવ્યો છે. જો આપણે અમેરિકા, ચીન અને ઓસ્ટ્રેલિયા જેવા દેશોની વાત કરીએ તો આ આંકડા 57, 119 અને 11 છે. આના પરથી સ્પષ્ટ થાય છે કે આ આંકડા અત્યંત જોખમી છે.
રોડ ટ્રાન્સપોર્ટ મિનિસ્ટ્રીના ડેટા મુજબ છેલ્લા એક દાયકા (2004-13)માં માર્ગ અકસ્માતમાં 12.1 લાખ લોકોએ જીવ ગુમાવ્યા છે. આ સમયગાળા દરમિયાન દેશમાં નોંધાયેલા વાહનોની સંખ્યા 2012માં 15.9 કરોડથી બમણી થઈને 2024માં અંદાજે 38.3 કરોડ થઈ ગઈ છે અને રસ્તાઓની લંબાઈ 2012માં 48.6 લાખ કિલોમીટરથી વધીને 2019માં 63.3 લાખ કિલોમીટર થઈ ગઈ છે. જોકે, નિષ્ણાતોએ જણાવ્યું હતું કે રસ્તાની લંબાઈ અને વાહનોની સંખ્યામાં વધારો દર વર્ષે વધુ મૃત્યુનું કારણ હોઈ શકે નહીં.
એક હત્યા માટે પણ સત્તાવાળાઓ પાસેથી ખુલાસો માંગવામાં આવે છે પરંતુ જીવલેણ માર્ગ અકસ્માતના કિસ્સામાં પણ આવી કાર્યવાહી કરવામાં આવતી નથી. દિલ્હી પોલીસના ભૂતપૂર્વ અધિકારીએ જણાવ્યું હતું કે, “સડક અકસ્માતો તમામ એજન્સીઓ માટે પ્રાથમિકતા નથી. ટોચના અધિકારીઓ ભાગ્યે જ જુનિયર પાસેથી સ્પષ્ટતા માંગે છે, ભલે એક ડઝન લોકો મૃત્યુ પામે.
તેલંગાણામાં રોડ સેફ્ટી ઓથોરિટીના અધ્યક્ષ અને વર્તમાન સાંસદ ટી કૃષ્ણ પ્રસાદે જણાવ્યું હતું કે હત્યાને મહત્વ આપવામાં આવે છે પરંતુ માર્ગ અકસ્માતો અને મૃત્યુને અવગણવામાં આવે છે. માર્ગ સલામતી પર ખાનગી સભ્યનું બિલ લાવવાનું આયોજન કરી રહેલા સાંસદે જણાવ્યું હતું કે એક વર્ષમાં માર્ગ અકસ્માતમાં મૃત્યુ પામેલા લોકોની સંખ્યા ભારતમાં અન્ય કોઈપણ કુદરતી આફત કરતાં વધુ છે.
