તંત્રએ 80 હજાર લોકોની મંજૂરી આપી, પણ અઢી લાખ લોકો ભેગા થઈ ગયા: ભોલે બાબાની ચરણની રજ લેવા પડાપડી થતા વોટરકેનનનો ઉપયોગ કરાયો, જેમાં ભાગદોડ મચતા સેંકડો લોકો કચડાયા
આયોજકો સહિત 22 લોકો વિરૂધ્ધ એફઆઈઆર નોંધાઇ, જેમાં મુખ્ય આરોપી ભોલે બાબા ઉર્ફે હરિ નારાયણ સાકરનું નામ નહિ: બાબા અન્ડરગ્રાઉન્ડ, પોલીસ દ્વારા શોધખોળ
ઉતરપદેશના હાથરસમાં સત્સંગ દરમિયાન થયેલી ભાગદોડમાં મોતનું તાંડવ સર્જાતા દેશભરમાં હાહાકાર મચી ગયો છે. આ દુર્ઘટનામાં અત્યાર સુધીમાં 122 લોકોના મોત નિપજ્યા છે. ઉપરાંત સેંકડો લોકો ઇજાગ્રસ્ત થયા હોવાના અહેવાલ મળી રહ્યા છે.
યુપીના હાથરસમાં ભોલે બાબાના સત્સંગ બાદ થયેલી નાસભાગમાં અત્યાર સુધીમાં 122 લોકોના મોત થયા છે. 4 જિલ્લા અલીગઢ, હાથરસ, એટાહ અને આગ્રામાં રાતોરાત મૃતદેહોનું પોસ્ટમોર્ટમ થયું. પરિવારના સભ્યો તેમના પ્રિયજનોના મૃતદેહોને લઈને અહીં-ત્યાં ભટકતા રહ્યા. જોકે, વહીવટીતંત્રે અત્યાર સુધીમાં 121 લોકોના મોતની પુષ્ટિ કરી છે.
મંગળવારે બપોરે 1 વાગ્યે ફુલરાઈ ગામમાં આ અકસ્માત થયો હતો. મંગળવારે મોડી રાત્રે, સિકંદરરૌ પોલીસ સ્ટેશનના ઇન્સ્પેક્ટરે અકસ્માતમાં 22 લોકો વિરુદ્ધ એફઆઈઆર નોંધાવી હતી. આમાં મુખ્ય આયોજકનું નામ દેવ પ્રકાશ મધુકર છે. બાકીના અજાણ્યા છે. ચોંકાવનારી વાત એ છે કે મુખ્ય આરોપી ભોલે બાબા ઉર્ફે હરિ નારાયણ સાકરનું નામ નથી.
અકસ્માત બાદ બાબા ભૂગર્ભમાં ઉતરી ગયા હતા. પોલીસે આખી રાત તેની શોધમાં દરોડા પાડ્યા હતા. પોલીસ મૈનપુરીમાં બાબાના આશ્રમ પહોંચી હતી, પરંતુ બાબા ત્યાં પણ મળ્યા ન હતા. મૈનપુરીમાં આશ્રમની બહાર પોલીસ તૈનાત છે.
અહીં વકીલ ગૌરવ દ્વિવેદીએ અલ્હાબાદ હાઈકોર્ટમાં પીઆઈએલ દાખલ કરીને અકસ્માતની સીબીઆઈ તપાસની માંગ કરી છે. સીએમ યોગી મોડી રાત સુધી અધિકારીઓ પાસેથી દુર્ઘટનાના અહેવાલો લેતા રહ્યા. આજે સવારે 11 વાગ્યે તેઓ હાથરસ જિલ્લા હોસ્પિટલ પહોંચ્યા છે.
પ્રશાસને 80 હજાર લોકોને મંજૂરી આપી હતી, પરંતુ 2.5 લાખ લોકો પહોંચ્યા હતા. સત્સંગ પૂરો થયા બાદ ભોલે બાબા બહાર આવ્યા ત્યારે મહિલાઓ તેમના ચરણ રજ લેવા દોડી આવી હતી. ભીડને વિખેરવા સ્વયંસેવકોએ વોટર કેનનનો ઉપયોગ કર્યો હતો. લોકો બચવા માટે અહીં-તહીં દોડવા લાગ્યા અને નાસભાગ મચી ગઈ. લોકો એકબીજાને કચડીને આગળ વધવા લાગ્યા.આમ આ દુર્ઘટના સર્જાઈ હતી.
કોણ છે સંત ભોલેબાબા?
સંત ભોલે બાબા મૂળ કાંશીરામ નગર (કાસગંજ)ના પટિયાલી ગામના રહેવાસી છે. તેમણે જણાવ્યું કે, બાળપણમાં તેઓ તેમના પિતા સાથે ખેતીકામ કરતા હતા. જ્યારે તેઓ યુવાન થયા ત્યારે તેઓ પોલીસમાં જોડાયા. રાજ્યના ડઝનબંધ પોલીસ સ્ટેશનો ઉપરાંત ઈન્ટેલિજન્સ યુનિટમાં તેમને પોસ્ટ કરવામાં આવ્યા હતા. પરંતુ 18 વર્ષની સેવા પછી તેમણે વિઆરએસ લીધું હતું. તેમણે જણાવ્યું કે, તેઓ પોતાના ગામમાં એક ઝૂંપડીમાં રહે છે અને લોકોને ભગવાનની ભક્તિનો પાઠ શીખવવા માટે ઉત્તર પ્રદેશ
અને નજીકના રાજ્યોમાં ફરે છે. સંત ભોલે બાબાના કહેવા પ્રમાણે, તેમના કોઈ ગુરુ નથી અને તેમને ભગવાન માટે અપાર પ્રેમ છે. એકવાર મને આ અંગે ખ્યાલ આવ્યો તે પછી મેં મારું આખું જીવન માનવ કલ્યાણ માટે સમર્પિત કરી દીધું છે. સંત ભોલે બાબાના લાખો અનુયાયીઓ છે.
