- જોડીયા તાલુકાના પીઠડ ગામમાં એક મીની ટ્રકમાં ઘાસના જથ્થા નીચે સંતાડેલો 1,212 નંગ ઇંગ્લિશ દારૂની બાટલીનો જથ્થો પકડાયો
- જથ્થો સંતાડી રહેલા ખાનપુર-મોરબીના એક શખ્સની અટકાયત
- જયારે દારૂના સપ્લાયર રાજકોટના બુટલેગરને ફરારી જાહેર કરાયો
જામનગર જિલ્લાના જોડિયા તાલુકાના પીઠડ ગામ પાસે જોડિયા પોલીસે દરોડો પાડી એક ટ્રકમાં ઘાસના જથ્થા નીચે સંતાડેલો 1,212 નંગ નાની મોટી ઇંગ્લિશ દારૂની બાટલીનો જથ્થો પોલીસે પકડી પડ્યો હતો અને એક શખ્સની અટકાયત કરી હતી. જ્યારે દારૂના સપ્લાયરને ફરારી જાહેર કરાયો છે.
અનુસાર માહિતી મુજબ, જોડિયા પોલીસની ટીમને ચોક્કસ બાતમી મળી હતી કે ગત મોડી રાત્રે પીઠડ ગામની સીમ વિસ્તારમાં એક મિની ટ્રકમાં ઈંગ્લીશ દારૂની હેરાફેરી કરવામાં આવી રહી છે. જે બાતમીના આધારે મોડી રાત્રે જોડીયા પોલીસે દરોડો પાડ્યો હતો. જે દરોડા દરમિયાન પોલીસને GJ-3 B.W 8627 નંબરનો મીની ટ્રક ધ્યાનમાં આવ્યો હતો. જેની તપાસ કરતાં ટ્રકમાં ઘાસનો જથ્થો ભરેલો હતો, પરંતુ પોલીસે ઘાસનો જથ્થો હટાવીને નીચે ચેક કરતા અંદરથી નાની મોટી 1,212 નંગ ઇંગ્લિશ દારૂની બાટલીનો જથ્થો મળી આવ્યો હતો.
આથી પોલીસે ઇંગલિશ દારૂ મિની ટ્રક અને મોબાઈલ ફોન વગેરે સહિત રૂપિયા 5,87,400ની માલમતા કબ્જે કર્યો હતો. જયારે દારૂની હેરાફેરી કરી રહેલા ખાનપર મોરબીના યશપાલસિંહ કનુભા જાડેજાની અટકાયત કરવામાં આવી હતી. આ ઉપરાંત પોલીસને પૂછપરછ દરમિયાન તેને ઉપરોક્ત દારૂનો જથ્થો રાજકોટના જંગલેશ્વર વિસ્તારમાં રહેતા સલીમ શેખ નામના શખ્સે સપ્લાય કર્યો હોવાથી પોલીસે તેને ફરારી જાહેર કરી તપાસનો દોર રાજકોટ સુધી લંબાવ્યો છે.
અહેવાલ : સાગર સંઘાણી
