- ભોયકા ગામે 80 વર્ષના વૃદ્ધા પર દુષ્કર્મની ઘટનાથી ચકચાર
- ચોરી કરવામાં ઈરાદે આવેલ શખ્સે આચર્યું દુષ્કર્મ
- પોલીસે ઘટના સ્થળે પહોચી કાર્યવાહી હાથ ધરી
મહિલાઓ માટે સુરક્ષીત માનવામાં આવતા ગુજરાતમાં પણ હવે દિવસે દિવસે દુષ્કર્મની ઘટનાઓ સામે આવી રહી છે. ત્યારે માનવતાને શરમશાર કરતી ઘટના સુરેન્દ્રનગરમાં બની છે. જેમાં લીંબડી તાલુકાના ભોયકા ગામે 80 વર્ષના વૃદ્ધા પર દુષ્કર્મની ઘટના સામે આવી હતી. મોડી રાતે વૃદ્ધાના ઘરમાં ત્રાટકેલા શખ્સે છરીના અણીએ ચોરી અને લુંટને અંજામ આપવાનો પ્રયત્ન કર્યો હતો. પરંતુ કોઈ વસ્તુ ન મળતા નરાધમ 80 વર્ષની મહિલા પર દુષ્કર્મ આચરી ભાગી ગયો હતો. તેમજ વૃદ્ધાને સારવાર અંગે સુરેન્દ્રનગર મેડિકલ કોલેજ ખાતે ખસેડવામાં આવ્યા હતા. ઘટનાની જાણ થતાં પાણશિણા પોલીસ સ્ટેશને ઘટના સ્થળે પહોચી આગળની કાર્યવાહી હાથ ધરી છે.
આ અંગે મળતી માહિતી મુજબ સુરેન્દ્રનગર જિલ્લામાં કાયદો અને વ્યવસ્થાની પરિસ્થિતિ સતત કથળતી જઈ રહી છે. ફાયરિંગ, મારામારી, જૂથ અથડામણ અને હત્યાના બનાવો સાથે હવે બળાત્કારના બનાવો પણ વધી રહ્યા છે. સુરેન્દ્રનગર જિલ્લાના લીંબડી તાલુકાના ભોંયકા ગામે 77 વર્ષના વૃદ્ધા ઉપર બળાત્કારની ઘટના બની છે. દસ દિવસ પહેલા જ વૃદ્ધા પોતાની દીકરી જામનગર રહેતી હતી ત્યાંથી પોતાના વતન ભોંયકા ગામે ઘરે આવ્યાં હતાં.
બળાત્કાર કરનાર શખ્સ પહેલા વૃદ્ધાના ઘરના નલિયા દૂર કરી ઘરમાં ઉતર્યો હતો અને પહેલા નાણાની માંગણી કરી હતી અને ત્યારબાદ તેમના પર બળાત્કાર કરી ફરાર થઇ ગયો હતો. હાલમાં વૃદ્ધાને સુરેન્દ્રનગરની સિવિલ હોસ્પિટલ ખાતે સારવાર માટે લાવવામાં આવ્યાં છે. ઘટનાના પગલે ડીવાયએસપી સહિતનો સ્ટાફ હાલ આ અંગે કામે લાગ્યો છે.
આ ઘટનામાં તાત્કાલિક તપાસના આદેશ આપવામાં આવ્યા છે પરંતુ અજાણ્યા ઈસમ દ્વારા ઘરના નળિયા ખોલી અને ઘરમાં સુતેલા આ વૃદ્ધા ઉપર દુષ્કર્મ ગુજારતા પરિવારમાં પણ શોકની લાગણી વ્યાપી જવા પામી છે.જામનગરથી તેમની દીકરી સહિતનો પરિવાર સુરેન્દ્રનગરની સિવિલ હોસ્પિટલે પહોંચ્યો છે અને ન્યાયની માંગણી કરવામાં આવી છે. વૃદ્ધાની હાલત ગંભીર હોવાનું સામે આવ્યું છે અને તેમના મેડિકલ ટેસ્ટ પણ શરૂ કરવામાં આવ્યા છે.
હવે 77 વર્ષના વૃદ્ધા પર પણ આ પ્રકારની ઘટનાઓ બની રહી છે ત્યારે સમાજમાં તર્ક-વિતરક સર્જાયા છે. હાલમાં ચેકઅપ માટે વૃદ્ધાને સિવિલ હોસ્પિટલ ખાતે રાખવામાં આવ્યા છે અને પોલીસ પણ ત્યાં દોડી ગઈ છે અને આ અંગે તપાસ ધરી રહી છે.
અહેવાલ: અશ્ચિનસિંહ રાણા
