- રંગમાં ભંગ પાડતી ગીર સોમનાથ પોલીસ
- રાજકોટ, તાલાલા, જૂનાગઢ, પોરબંદરના પ્યાસીઓની ધરપકડ કરી બિયર, દારૂ, બાઇટિંગ સહીત રૂ. 1.81 લાખનો મુદ્દામાલ કબ્જે
ગીર સોમનાથ પંથકના રિસોર્ટમાં ચાલતી દારૂની મહેફીલો સહિતની ગેરકાયદે પ્રવૃત્તિઓ પર જિલ્લા ક્રાઇમ બ્રાન્ચે ધોસ બોલાવી છે. ગીરપંથકના 2 રિસોર્ટ પર દરોડો પાડતા પોરબંદર, રાજકોટ, ધોરાજી, જૂનાગઢ, તાલાલાના નશાખોરો દારૂની મહેફિલ માણતા રંગેહાથ ઝડપાઇ આવતા તમામને જેલ હવાલે કરી કાયદેસરની કાર્યવાહી હાથ ધરવામાં આવી છે.
પ્રાપ્ત વિગત અનુંસંત એલસીબી પી.આઈ એ.બી.જાડેજા, પીએસઆઈ આકાશસિંહ સિંધવ સહિતનો સ્ટાફ પેટ્રોલીંગમાં હતો. ત્યારે સાસણ ગીર નજીક ચિત્રોડ ગામની સીમમાં આવેલ સ્વાગત રિસોર્ટમાં દરોડો પાડતા વિદેશી દારૂની મહેફિલ માણતા રિસોર્ટ સંચાલક જેતપુરના રામજી મંદીર પાછળ રહેતો 33 વર્ષીય પ્રશાંત જયસુખભાઈ ભટ્ટી, તેમજ રાજકોટમાં નાના મવા સર્કલ નજીક રહેતા અને હોટલ વ્યવસાય ધરાવતા 57 વર્ષીય પટેલ વિઠ્ઠલભાઇ ડાયાભાઇ અમીપરા, રાજકોટના મવડી પ્લોટ વિસ્તારમાં રહેતા 43 વર્ષીય વેપારી બિપીન મોહનભાઇ પટેલ, રાજકોટ કોટડાસાંગાણીના પડવલા ગામે રહેતા સહદેવસિંહ ચંદુભા જાડેજા અને મહેન્દ્ર દેવજીભાઇ ચૌહાણ, પોરબંદર આશાપુરા ચોકડી નજીક રહેતા ખારવા રમેશભાઇ જાદવભાઈ વાંદરીયા, ખારવા હિતેષભાઇ મેઘજીભાઇ બાદરશાહી, ખારવા નારણભાઇ બાબુભાઇ સલેટ, ખારવા નિલેશ માવજીભાઇ લોઢારી વિદેશી દારૂની મહેફિલ માણતા રંગેહાથ ઝડપાઇ આવ્યા હતા. આવી જ રીતે સાંગોદ્રા ગામના પાટિયા નજીક બોરવાવ ગીર ગામની સીમમાં આવેલી ધ ગીર પલ્સ નામના રિસોર્ટમાં દરોડો પાડતા રિસોર્ટ સંચાલક સાસણ ગીરના ખડાનેસનો 21 વર્ષીય યુવક રબારી ભરત હાજાભાઈ, મુછાળ રબારી તેમજ તાલાલાના ગુંદરણ ગામે માલધારી વસાહતમાં રહેતા રબારી સુરેશ રામભાઇ કરમટા અને રિસોર્ટમાં નોકરી કરતો રાજકોટના કોઠારીયા રોડ સુરભી પાર્ક-1માં રહેતો વાળંદ પરેશ મનસુખભાઈ કાલાવાડીયા વિદેશી દારૂની મહેફિલ માણતા રંગેહાથ ઝડપાઇ આવ્યા હતા. આ બન્ને રિસોર્ટમાં દારૂની મહેફિલ માણતા તમામ નશાખોરો સહિત રિસોર્ટ સંચાલકો વિરુદ્ધ તાલાલા પોલીસ સ્ટેશનમાં અલગ અલગ ગુના નોંધી તમામને જેલ હવાલે કરી કાયદેસરની કાર્યવાહી હાથ ધરવામાં આવી છે.
