આસુરી વૃત્તિ પર વિજયની ઉજવણીના ભાગ રૂપે શહેરીજનોએ ફાફડા, જલેબી અને મીઠાઈની લીજ્જત માણી
નવરાત્રીમાં માતાજીની આરાધના પછી આજે દશેરા અવસર આવ્યો છે. આજનો અવસર માતાજીના નવ દિવસના યુધ્ધ પછી મહિસાસૂર ઉપરના વિજયની અને શ્રી રામના નવ દિવસનો ધમસાણ યુધ્ધ પછી રાવણ ઉપરના વિજયની ઉજવણીનો અવસર છે.
એવી માન્યતા છે કે રામે રાવણનો આજના દિવસે વધ કર્યો હતો. સાથે એવું પણ કહેવાય છે કે રાવણનો વધ કર્યા પહેલા રામે સમુદ્ર તટ પર ૯ દિવસ સુધી ર્મા દુર્ગાની આરાધના કરી હતી અને દસમાં દિવસે તેમને વિજય પ્રાપ્ત થઈ હતી તો એક માન્યતા એવી પણ છે કે માં દુર્ગાએ નવ રાત્રી અને દસ દિવસ સુધી યુધ્ધ કર્યા બાદ રાક્ષસ મહિસાસૂરનો વધ કર્યો હતો.
વર્ષમાં એવા ત્રણ જ મૂહૂર્ત એવા જે વણજોયા મુહુર્ત તરીકે મનાય છે. એવા મુહુર્તમાં આજનું વિજયાદશમીનુ મુહુર્ત વણજોયું છે. આજના દિવસે દરેક પ્રકારનાં શુભકાર્યો થાય છે.
મકાન, દુકાનના ઉદઘાટન માટે આજનો દિવસ શુભ મનાય છે. આજે ઠેર ઠેર રાવણ દહનના કાર્યક્રમો થશે અને આતશબાજી સાથે અસત્ય પર સત્યના વિજયની ઉજવણી કરાશે.
