જસદણના ખડવાવડી ગામે સરકારી જમીનનું બે જ્ઞાતિએ દબાણ કર્યું છે. જેમાં એક જ્ઞાતીના દબાણની દિવાલ બીજી જ્ઞાતિએ તોડી પાડતા આ અંગે ખોબા જેવડા ખડવાવડીમાં કોઈ વેરઝેર ન થાય તે અંગે ગ્રામ્યજનોનું એક ટોળુ જસદણ તાલુકા પંચાયત કચેરી ખાતે દોડી આવતા તાલુકા વિકાસ અધિકારી આઈ.એમ.બેલીમે તપાસ શરૂ કરવાની ખાતરી આપતા અને સ્થળ પર સર્કલ ઈન્સ્પેકટરને દોડાવતા આ મામલો હાલ તો શાંત પડી ગયો છે પણ આવનારા દિવસોમાં શું ? એવો લાખ મણનો સવાલ ઉઠવા પામ્યો છે. જસદણ પંથકમાં એક બાજુ સરકારી જમીનો પર દબાણ કરનારા પોતાના બાપદાદાની માલિકીની હોય એમ ખુલ્લેઆમ ચણતર કરે છે. તેમને રાજકીય ઓથ હોવાથી અધિકારીઓ પણ ફફડતા જીવે કામ કરી રહ્યાં છે. ખડવાવડીમાં બંને પક્ષોએ સરકારી જમીન દબાણ કરી છે. વળી પાછા ફરિયાદ કરવા માટે પણ દોડી જાય છે ત્યારે હાલમાં તો નિર્દોષ ગ્રામ્યજનોને મોટેભાગે સહન કરવું પડી રહ્યું છે.
