યોગ કરો સ્વસ્થ રહો
યોગ એ માત્ર શારીરિક અભ્યાસ નથી પરંતુ માનસિક રીતે પણ સ્વસ્થ રહેવા યોગાભ્યાસ જરૂરી છે. પ્રાચીન સમયમાં ઋષિમુનિઓ તપ-સાધના કરી વર્ષો સુધી એક જ અવસ્થામાં રહેતા અને આ સંભવ થતું માત્રને માત્ર યોગનાં કારણે આપણા ઋષિ મુનિઓ બ્રહ્મથી પરબ્રહ્મની પ્રાપ્તિ કરતા યોગાભ્યાસથી આજે આપણે શરીર, મનની એકાગ્રતાવાળા વૃક્ષાસન વિશે જાણીશું.
વૃક્ષાસન
આ આસન વૃક્ષની શાંતી અને સ્થિરતાને દર્શાવે છે. અન્ય યોગાસનોથી વિપરીત આ આસનમાં શરીરના સંતુલનને જાળવી રાખવા માટે આંખ ખુલ્લી રાખવાની હોય છે.
વૃક્ષાસન કેવી રીતે કરવું
- બંને હાથો સીધા ઉપર ઉઠાવો
- ડાબા ગોઠણને વાળીને ડાબા પગનો પંજો જમણા પગનાં સાથળ પર રાખો. પગના તળીયા સાથળ ઉપર સીધા તેમજ ઉપરના ભાગે ગોઠવો
- જમણા પગને સીધો રાખી સંતુલન બનાવવાની કોશિશ કરો
- સંતુલન બનાવવા માટે ઉંડો શ્ર્વાસ લો અને બંને હાથને ઉપરની તરફ ખેંચી નમસ્કારની મુદ્રા બનાવો
- બિલકુલ સામેની તરફ જોવો. સીધી નજર સંતુલન બનાવવામાં મદદરૂપ થશે
- મેરૂદંડ (કમરના મણકા) સીધા રાખો આખુ શરીર વૃક્ષની જેમ સીધુ હોવુ જોઈએ ત્યારબાદ શ્ર્વાસ છોડતા શરીરને ઢીલુ છોડો અને વિશ્રામ કરો
- ધીરે-ધીરે શ્ર્વાસ છોડતા હાથને નીચે લ્યો અને ડાબા પગને નીચે ઉતારી સીધા કરો
- પગ સીધા કરી એકદમ ટટ્ટાર ઉભા રહો ત્યારબાદ જમણા પગને ડાબા સાથળ પર મુકી આસન ફરી કરો
વૃક્ષાસનનાં લાભ
- આસન કર્યા બાદ શરીરમાં ઉર્જા ઉત્પન્ન થશે
- આ આસન પગ, હાથ અને ખભાની માસપેશીયોમાં ખેંચાણ પેદા કરે છે અને તાજગી મહેસુસ થાય છે
- વૃક્ષાસનથી માસપેશિયામાં સ્થિરતા અને સંતુલન આવે છે
- એકાગ્રતા વધે છે
- પગ મજબુત થાય છે, સંતુલન જળવાઈ રહે છે
- નસનાં દર્દોમાં સહાયક બને છે
વૃક્ષાસન કોણે ન કરવું
- જો તમે માઈગ્રેશન, અનિદ્રા, બ્લડપ્રેશરનાં પેશન્ટ હોય તો વૃક્ષાસન કરવાનું ટાળવું
