વોર્ડ નંબર 8માં સારું આરોગ્ય કેન્દ્ર સ્થપાય તેવી પ્રજાની અપેક્ષા

રાજકોટના પ્રબુદ્ધ નાગરિકોના મતે પક્ષ કોઇપણ હોય લોકોની સવલતો પુરી થવી જોઇએ

રાજકોટની સ્માર્ટ પ્રજા ૨૧ ફેબ્રુઆરીએ સ્માર્ટ નગરસેવકો પર વિશ્ર્વાસ મુકશે: ૨૩મીએ પરિણામ

વોર્ડ નં. ૧ થી ૯માં લોકો સ્માર્ટ બન્યા અને નગરસેવકોને પણ સ્માર્ટનેસ તરફ આગળ વધવા ફરજ પાડી

રાજકોટ કોર્પોરેશન ચૂંટણીના પડઘમ વાગી ચુક્યા છે.૨૧ ફેબ્રુઆરીએ મતદાન બાદ ૨૩ ફેબ્રુઆરીએ ઉમેદવારોના ભાવિ નક્કી થઈ જશે ત્યારે છેલ્લા ૫ વર્ષમાં કોર્પોરેટરોએ વોર્ડમાં કરેલા કામો દ્વારા લોકો કેટલા સંતુષ્ટ છે? તે જાણવાનો પ્રયત્ન અબતક ચેનલ દ્વારા કરવામાં આવ્યો હતો.વોર્ડ ૧ થી ૧૮ ના એન.જી.ઓ, જ્ઞાતિ અગ્રણીઓ સહિત પ્રબુદ્ધ નાગરિકોએ અબતક ચેનલને વોર્ડની હાલની સ્થિતિ તેમજ આવનારા વર્ષોમાં રહેવાસીઓની મહત્વકાંક્ષાઓ વર્ણવી હતી. રાજકોટના રહેવાસીઓ સ્માર્ટ સિટીની જેમ સ્માર્ટ નગર સેવકો ઈચ્છે છે.

રાજકોટ મહાપાલિકાની ચૂંટણીનો ધમધમાટ શરૂ થયો છે. શહેર ભાજપ, કોંગ્રેસ અને આમ આદમી પાર્ટીએ ઉમેદવારો પસંદ કરવાની પ્રક્રિયા શરૂ કરી દીધી છે તેમજ અનેક વોર્ડના ઉમેદવારો પણ નક્કી થઈ ચૂક્યા છે. ટિકિટના અપેક્ષિત ઉમેદવારોથી લઈને કાર્યકરો અને સંગઠના હોદ્દેદારોએ નિરીક્ષકોને પોતાની રજુઆત કરી છે. આ વખતે ઉમેદવાર પસંદગી માટે ખાસ અપેક્ષાઓ તમામ પાર્ટીએ રાખી છે જેમાં ઉમેદવાર નું સામાજિક કામોનું બેકગ્રાઉન્ડ, સોસીયલ મીડિયામાં તેની પહોંચ, સ્થાનિક લેવલે લોકપ્રિયતા, પાર્ટી માટે કરેલા કામો અને લાયકાત ગણવામાં આવી રહી છે. રાજકોટ મનપાની ચૂંટણીમાં ભાજપની સેન્સ ની પ્રક્રિયા પહેલા શહેર ભાજપના ૪ થી ૫ દિગજ્જ નેતાઓએ ચૂંટણી ન લડવાની વાત કરી છે જેમાં નીતિનભાઈ ભારદ્વાજ, પૂર્વ મેયર બીનાબેન આચાર્ય, ઉદય કાનગડ, કશ્યપ શુક્લ, અરવિંદભાઈ રૈયાણી સહિતના અગ્રણીઓએ ચૂંટણી ન લડવા માટે પોતાની વાત દર્શાવી ચુક્યા છે. ગત ચૂંટણીમાં ભાજપને ૩૮ અને કોંગ્રેસને ૩૪ બેઠકો મળતા કોંગ્રેસ ઉમેદવારો અને કાર્યકરોનો ઉત્સાહ બમણો છે તો સાથેજ આ વર્ષે ત્રીજી પરિબળ આમ આદમી પાર્ટી પણ પોતાના ઉમેદવારોને ચૂંટણી લડાવી જીતાડવાનો પ્રયત્ન કરી રહી છે.ત્યારે આવનારા દિવસોમાં રાજકોટ મહાનગર પાલિકામાં કોણ બાજી મારશે? તે જોવું રહ્યું.

ઉલ્લેખનીય છે કે રાજકોટ શહેરના ૧૮ વોર્ડના ભારતીય જનતા પાર્ટીના ૭૨ ઉમેદવારો માટે કુલ ૭૮૪ જેટલા અપેક્ષિત વ્યક્તિઓ સેન્સ પ્રક્રિયામા આવ્યા હતા. ભાજપ અગ્રણીઓ પુષ્પદાનભાઈ ગઢવી, ગીરીશભાઈ શાહ, જાગૃતિબેન પંડ્યા,મહેન્દ્રસિંહ સરવૈયા, દિલીપભાઈ ત્રિવેદી ,આદ્યશક્તિબેન મજમુદાર ,બાબુભાઈ બોખીરિયા,ભરતસિંહ ગોહિલ, બીજલબેન પટેલ,નરહરિભાઈ અમીન, માધાભાઈ બોરીચા અને નિમુબેન બાંભણીયા દ્વારા સેન્સ લેવામાં આવી હતી ત્યારે ભાજપ અને કોંગ્રેસ બંને પક્ષના અગ્રણીઓ દ્વારા “ટીકીટ” માટે કોઈ પણ પ્રકારની ભલામણ ચલાવવામાં નહીં આવે તેવી જાહેરાત પણ કરવામાં આવી છે. ભાજપ દ્વારા પેઈજ સમિતિની રચના કરી પેઈજ પ્રમુખો પણ બનાવવામાં આવ્યા છે.જેમાં મુખ્યમંત્રી વિજયભાઈ રૂપાણી પણ પેઈજ પ્રમુખ બન્યા છે. પેઈજ સમિતિ દ્વારા ગ્રાઉન્ડ લેવલે ભાજપે માઇક્રો પલાનિંગ કર્યું છે ત્યારે કોંગ્રેસ દ્વારા નગરજનોને વિકાસરૂપી અંધારા માંથી બહાર આવવા માટે જાગૃત કરવામાં આવી રહ્યા છે.

વોર્ડ ૮માં સારૂ આરોગ્ય કેન્દ્ર સ્થપાય તેવી અપેક્ષા: ધર્મેન્દ્ર ચૌહાણ (સભ્ય, આનંદી ચેરીટેબલ ટ્રસ્ટ)

ઓટોમોબાઇલ ક્ષેત્રે જોડાયેલ તેમજ શહેરના સેવાભાવી આનંદી ચેરીટેબલ ટ્રસ્ટના સભ્ય ધર્મેન્દ્ર ચૌહાણે અબતક મીડિયા સાથેની વાતચીતમાં જણાવ્યું હતું કે વોર્ડ નંબર ૮ માં ડીઆઈ પાઇપલાઇન નખાઈ ગઈ છે ત્યારે ગૃહીણીઓનો પાણી પ્રશ્ન હલ થઈ ચૂક્યો છે.સૌથી જૂનો પ્રશ્ન હતો લક્ષમીનગર નાલાનો ત્યાં અત્યારે અન્ડર બ્રિજ બનશે કામ પણ શરૂ થઈ જતા હજારો લોકોને ત્રાફિક સમસ્યા તેમજ અન્ય ઘણી સમસ્યાઓથી ખુબજ લાભ થશે.ટીપર વાનની સૌથી સારી કામગીરી વોર્ડ ૮ માં થઈ રહી છે જેમાં સ્વરછતાં ખુબજ સારી બની રહી છે. નગર સેવકો કોઈ પણ પક્ષના આવે અમારે એકજ આશા છે વોર્ડ માં ચોખ્ખાઈ સારી રહે અને સ્વાસ્થ્ય જળવાઈ રહે.એક સારું આરોગ્ય કેન્દ્ર વોર્ડ નંબર ૮ માં સ્થપાઈ તેવી આશા આવનારા નગર સેવકો પાસે છે.

ગાર્બેજ કલેક્શનની પ્રક્રિયા ખુબજ સારી છે, નગરસેવકોએ વોર્ડ ૮નો ઘણો વિકાસ કર્યો છે: રવિ ચાવડીયા (સામાજીક અગ્રણી)

રવિ ચાવડીયાએ અબતક મીડિયા સાથેની વાતચીતમાં જણાવ્યું હતું કે સૌથી મોટો લક્ષમીનગર નાલાનો પ્રશ્ન હલ થઈ ને અન્ડર બ્રિજ બની રહ્યો છે તે સૌથી મોટી ભેટ કહી શકાય.સફાઈ કર્મીઓ વોર્ડ ૮ માં ખુબજ સારી કામગીરી કરી રહ્યા છે, ગાર્બેજ કલેક્શન ખુબજ સારું થઈ રહ્યું છે જેને કારણે રહેવાસીઓ ખુબજ ખુશ છે. ઘણી ઝૂંપડપટ્ટી આ વિસ્તારમા છે પરંતુ ધીમે ધીમે લોકોનું આરોગ્ય જળવાઈ રહે તે હેતુથી તંત્ર સારી કામગીરી રહ્યું છે.છેલ્લા ૫ વર્ષમાં કોર્પોરેટરોનો લોક સંપર્ક સારો રહ્યો છે જેથી કોઈ પણ સમસ્યાઓનું નિરાકરણ ઝડપથી આવે છે.